bichhaD gaya tha koi KHwab-e-dil-nashin mujhse

bichhaḌ gayā thā koī ḳhvāb-e-dil-nashīñ mujh se

bahut dinoñ mirī āñkheñ judā rahīñ mujh se

maiñ saañs tak nahīñ letā parā.ī ḳhushbū meñ

jhijhak rahī hai yūñhī shāḳh-e-yāsmīñ mujh se

mire gunāh kī mujh ko sazā nahīñ detā

mirā ḳhudā kahīñ nārāz to nahīñ mujh se

ye shāhkār kisī zid kā shāḳhsāna hai

ulajh rahā thā bahut naqsh-e-avvalīñ mujh se

maiñ taḳht par huuñ magar yuuñ to ḳhāk-zāda hī

gurez karte haiñ kyuuñ boriyā-nashīñ mujh se

ujaḌ ujaḌ ke base haiñ mire dar-o-dīvār

bichhaḌ bichhaḌ ke mile haiñ mire makīñ mujh se

bikhar rahī hai tap-e-intiqām se mirī ḳhaak

guzar rahī hai koī mauj-e-ātishīñ mujh se

muhāl hai ki tamāshā tamām ho 'shāhid'

tamāsh-bīn se maiñ ḳhush tamāsh-bīñ mujh se

bichhaD gaya tha koi KHwab-e-dil-nashin mujh se

bahut dinon meri aankhen juda rahin mujh se

main sans tak nahin leta parai KHushbu mein

jhijhak rahi hai yunhi shaKH-e-yasmin mujh se

mere gunah ki mujh ko saza nahin deta

mera KHuda kahin naraaz to nahin mujh se

ye shahkar kisi zid ka shaKHsana hai

ulajh raha tha bahut naqsh-e-awwalin mujh se

main taKHt par hun magar yun to KHak-zada hi

gurez karte hain kyun boriya-nashin mujh se

ujaD ujaD ke base hain mere dar-o-diwar

bichhaD bichhaD ke mile hain mere makin mujh se

bikhar rahi hai tap-e-intiqam se meri KHak

guzar rahi hai koi mauj-e-atishin mujh se

muhaal hai ki tamasha tamam ho 'shahid'

tamash-bin se main KHush tamash-bin mujh se