بچھڑ کے اس سے جو نکلے تو بے نوا تھے بہت

بچھڑ کے اس سے جو نکلے تو بے نوا تھے بہت

وہ لا شریک نہ بھی ہو شریک لا تھے بہت

ہوا نہ کچھ بھی جو ہم سے مفاہمت تو ہوئی

ہم اپنے آپ سے اب تک خفا خفا تھے بہت

فضا ہے سست غم مرگ ہم خیالاں سخت

ہجوم شہر میں ہونے کو ہم نوا تھے بہت

کہیں جو سچ کی کرن تھی تو آئنہ میں تھی

مگر وہ خوف کہ چہرے ہوا ہوا تھے بہت

گماں غلط تھا کہ جو شخص بھی ہے ہم سا ہے

وہ ہم ہی تھے کہ ہر اک شخص سے جدا تھے بہت

یہ کس خطا پہ ملی بے قیامیوں کی سزا

کہ پا شکستہ سزا یاب بے خطا تھے بہت

کہاں گیا کہ وہ رکھتا ہے جان و دل سے عزیز

یہ اک مغالطہ ہم جس میں مبتلا تھے بہت