bigaDne wala kisi din sanwar hi jaega

bigaḌne vaalā kisī din sañvar hī jā.egā

mizāj-e-dost bil-āḳhir sudhar hī jā.egā

marīz-e-ishq abhī bekalī meñ hai lekin

buḳhār ek din us kā utar hī jā.egā

jo phuul aaj sar-e-shāḳh hai mahaktā huā

vo ek mauj-e-sabā meñ bikhar hī jā.egā

guzar rahī hai pareshān zindagī lekin

chale chalo ki ye rasta guzar hī jā.egā

isī ḳhayāl se nekī zarūr kartī huuñ

ki buuñd buuñd se tālāb bhar hī jā.egā

jo gir ke raah meñ uThne kā azm rakhtā hai

vo paar aag kā dariyā bhī kar hī jā.egā

ye soch kar hī ravābit meñ ijz bhī rakhnā

hai jis kī ḳhaak jahāñ kī udhar hī jā.egā

'sabīla' ḳhvāb meñ vo sair ko agar nikle

uḌan-khaTole pe pariyoñ ke ghar hī jā.egā

bigaDne wala kisi din sanwar hi jaega

mizaj-e-dost bil-aKHir sudhar hi jaega

mariz-e-ishq abhi bekali mein hai lekin

buKHar ek din us ka utar hi jaega

jo phul aaj sar-e-shaKH hai mahakta hua

wo ek mauj-e-saba mein bikhar hi jaega

guzar rahi hai pareshan zindagi lekin

chale chalo ki ye rasta guzar hi jaega

isi KHayal se neki zarur karti hun

ki bund bund se talab bhar hi jaega

jo gir ke rah mein uThne ka azm rakhta hai

wo par aag ka dariya bhi kar hi jaega

ye soch kar hi rawabit mein ijz bhi rakhna

hai jis ki KHak jahan ki udhar hi jaega

'sabila' KHwab mein wo sair ko agar nikle

uDan-khaTole pe pariyon ke ghar hi jaega