bigaDta mood hai mera wo jab bhi yaad hota hai

bigaḌtā mood hai merā vo jab bhī yaad hotā hai

bahut sā vaqt rone meñ yūñhī barbād hotā hai

mujhe lagtā hai yuuñ mahbūb kā chechak-zada chehra

munaqqash jis tarah zarf-e-murādābād hotā hai

kisī bhī saas se pūchho kahegī vo bhī ye fauran

bahut hī lālchī ab to har ik dāmād hotā hai

tarannum jis kā achchhā ho usī kā naam hai shā.ir

churā kar jo ġhazal paḌh de vahī ustād hotā hai

kahīñ dangā jo hotā hai agar das biis marte haiñ

hukūmat ke laboñ par harche bādā-bād hotā hai

agar do chaar bachche hoñ girānī maar detī hai

baḌī mushkil meñ ab to sāhib-e-aulād hotā hai

fasāna āshiqī kā muḳhtasar 'muḳhtār' hai itnā

koī barbād kartā hai koī barbād hotā hai

bigaDta mood hai mera wo jab bhi yaad hota hai

bahut sa waqt rone mein yunhi barbaad hota hai

mujhe lagta hai yun mahbub ka chechak-zada chehra

munaqqash jis tarah zarf-e-muradabaad hota hai

kisi bhi sas se puchho kahegi wo bhi ye fauran

bahut hi lalchi ab to har ek damad hota hai

tarannum jis ka achchha ho usi ka nam hai shair

chura kar jo ghazal paDh de wahi ustad hota hai

kahin danga jo hota hai agar das bis marte hain

hukumat ke labon par harche baada-baad hota hai

agar do chaar bachche hon girani mar deti hai

baDi mushkil mein ab to sahib-e-aulad hota hai

fasana aashiqi ka muKHtasar 'muKHtar' hai itna

koi barbaad karta hai koi barbaad hota hai