bim-o-raja mein qaid har ek mah-o-sal hai

bīm-o-rajā meñ qaid har ik māh-o-sāl hai

jaise ye zindagī bhī koī yarġhamāl hai

uljhā huuñ aatī jaatī sadāoñ se bārhā

bichhḌā huuñ har navā se ki ḳhvāb-o-ḳhayāl hai

TuuTā huuñ is tarah ki bikhartā chalā gayā

bikhrā huuñ is tarah ki sañvarnā muhāl hai

is jabr-o-iḳhtiyār se pāmāl maiñ bhī huuñ

ai rūh-e-ehtijāj batā kyā ḳhayāl hai

vīrān rahguzār pe uḌtī hai roz ḳhaak

ab tak mirī talāsh meñ bād-e-shimāl hai

sūrat-garī ke shauq ne gumrāh kar diyā

ab maiñ mirī jabīñ mirā dast-e-savāl hai

bas yūñhī mat guzar kabhī sahbā se baat kar

kahte haiñ us se milnā baḌā nek faal hai

bim-o-raja mein qaid har ek mah-o-sal hai

jaise ye zindagi bhi koi yarghamal hai

uljha hun aati jati sadaon se barha

bichhDa hun har nawa se ki KHwab-o-KHayal hai

TuTa hun is tarah ki bikharta chala gaya

bikhra hun is tarah ki sanwarna muhaal hai

is jabr-o-iKHtiyar se pamal main bhi hun

ai ruh-e-ehtijaj bata kya KHayal hai

viran rahguzar pe uDti hai roz KHak

ab tak meri talash mein baad-e-shimal hai

surat-gari ke shauq ne gumrah kar diya

ab main meri jabin mera dast-e-sawal hai

bas yunhi mat guzar kabhi sahba se baat kar

kahte hain us se milna baDa nek fal hai