bit gaya hangam-e-qayamat roz-e-qayamat aaj bhi hai

biit gayā hañgām-e-qayāmat roz-e-qayāmat aaj bhī hai

tark-e-ta.alluq kaam na aayā un se mohabbat aaj bhī hai

saḳht sahī hastī ke marāhil-e-ishq meñ rāhat aaj bhī hai

ai ġham-e-jānāñ ho na gurezāñ terī zarūrat aaj bhī hai

gulshan-e-husn-e-yār meñ karte haiñ jo talāsh-e-kaif-o-sukūñ

laakh hai barham nazm-e-do-ālam zulf meñ nik.hat aaj bhī hai

nūr-e-sahar hai jān-e-tasavvur zulmat-e-shab se kaun Dare

laakh banī hai ziist jahannam sāmne jannat aaj bhī hai

sub.h-e-bahār aa.ī thī le kar rut bhī na.ī shāḳheñ bhī na.ī

ġhuncha-o-gul se pyaar hai lekin shāḳh se nafrat aaj bhī hai

arz-e-tamannā kar ke gañvāyā ham ne bharam ḳhuddārī kā

ho ga.ī go takmīl-e-tamannā dil ko nadāmat aaj bhī hai

kar ke sitam kī parda-poshī ham ne unheñ be-aib kiyā

varna 'shakīl' apne hoñToñ par harf-e-shikāyat aaj bhī hai

bit gaya hangam-e-qayamat roz-e-qayamat aaj bhi hai

tark-e-talluq kaam na aaya un se mohabbat aaj bhi hai

saKHt sahi hasti ke marahil-e-ishq mein rahat aaj bhi hai

ai gham-e-jaanan ho na gurezan teri zarurat aaj bhi hai

gulshan-e-husn-e-yar mein karte hain jo talash-e-kaif-o-sukun

lakh hai barham nazm-e-do-alam zulf mein nikhat aaj bhi hai

nur-e-sahar hai jaan-e-tasawwur zulmat-e-shab se kaun Dare

lakh bani hai zist jahannam samne jannat aaj bhi hai

subh-e-bahaar aai thi le kar rut bhi nai shaKHen bhi nai

ghuncha-o-gul se pyar hai lekin shaKH se nafrat aaj bhi hai

arz-e-tamanna kar ke ganwaya hum ne bharam KHuddari ka

ho gai go takmil-e-tamanna dil ko nadamat aaj bhi hai

kar ke sitam ki parda-poshi hum ne unhen be-aib kiya

warna 'shakil' apne honTon par harf-e-shikayat aaj bhi hai