bite din jab bhi yaad aate hain

biite din jab bhī yaad aate haiñ

ashk palkoñ pe jhilmilāte haiñ

terī yādoñ ke chāñd tāroñ se

shab-e-furqat ko ham sajāte haiñ

hāl-e-fasl-e-bahār mat pūchho

phuul kāñToñ meñ muñh chhupāte haiñ

tum jo kahte ho sirf kahte ho

ham jo kahte haiñ kar dikhāte haiñ

ham ki fitna fasād kī bāteñ

jahāñ sunte haiñ bhuul jaate haiñ

vahī taqsīm ke haiñ zimmedār

ham pe ilzām jo lagāte haiñ

phir se taqsīm ham na ho jaa.eñ

aaj hālāt ye batāte haiñ

merī uñglī pakaḌ ke chalte the

ab mujhe rāsta dikhāte haiñ

tere ash.ār haiñ ki ai 'zaḳhmī'

zauq vāloñ se daad paate haiñ

bite din jab bhi yaad aate hain

ashk palkon pe jhilmilate hain

teri yaadon ke chand taron se

shab-e-furqat ko hum sajate hain

haal-e-fasl-e-bahaar mat puchho

phul kanTon mein munh chhupate hain

tum jo kahte ho sirf kahte ho

hum jo kahte hain kar dikhate hain

hum ki fitna fasad ki baaten

jahan sunte hain bhul jate hain

wahi taqsim ke hain zimmedar

hum pe ilzam jo lagate hain

phir se taqsim hum na ho jaen

aaj haalat ye batate hain

meri ungli pakaD ke chalte the

ab mujhe rasta dikhate hain

tere ashaar hain ki ai 'zaKHmi'

zauq walon se dad pate hain