bite hue lamhat ko pahchan mein rakhna

biite hue lamhāt ko pahchān meñ rakhnā

murjhā.e hue phuul bhī gul-dān meñ rakhnā

kyā jāneñ safar ḳhair se guzre ki na guzre

tum ghar kā pata bhī mire sāmān meñ rakhnā

kyā din the mujhe shauq se mehmān bulānā

aur ḳhud ko magar ḳhidmat-e-mehmān meñ rakhnā

kyā vaqt thā kyā vaqt hai is soch se hāsil

chhoḌo jo huā kyā use mīzān meñ rakhnā

insān kī niyyat kā bharosa nahīñ koī

milte ho to is baat ko imkān meñ rakhnā

pursish hai bahut saḳht vahāñ fard-e-amal kī

kuchh na.at ke ash.ār bhī dīvān meñ rakhnā

muḳhlis ho raho Tokā hai kis ne tumheñ 'anjum'

raftār-e-zamāna bhī magar dhyān meñ rakhnā

bite hue lamhat ko pahchan mein rakhna

murjhae hue phul bhi gul-dan mein rakhna

kya jaanen safar KHair se guzre ki na guzre

tum ghar ka pata bhi mere saman mein rakhna

kya din the mujhe shauq se mehman bulana

aur KHud ko magar KHidmat-e-mehman mein rakhna

kya waqt tha kya waqt hai is soch se hasil

chhoDo jo hua kya use mizan mein rakhna

insan ki niyyat ka bharosa nahin koi

milte ho to is baat ko imkan mein rakhna

pursish hai bahut saKHt wahan fard-e-amal ki

kuchh nat ke ashaar bhi diwan mein rakhna

muKHlis ho raho Toka hai kis ne tumhein 'anjum'

raftar-e-zamana bhi magar dhyan mein rakhna