bijli kahin girae zamane guzar gae

bijlī kahīñ girā.e zamāne guzar ga.e

jalva use dikhā.e zamāne guzar ga.e

tum se nigāh haTtī na thī vo bhī vaqt thā

lamhāt ab vo aa.e zamāne guzar ga.e

kyoñ chhānte ho ḳhaak miyāñ kū-e-yār kī

us ko to ḳhat jalā.e zamāne guzar ga.e

kaise kaheñ ki rābta us se rahā nahīñ

jis ko hameñ bhulā.e zamāne guzar ga.e

ik baar us kī diid kī ham ko hai aarzū

yāroñ fareb khaa.e zamāne guzar ga.e

ye kis gumān meñ ho hameñ zer karke tum

ham ko to sar jhukā.e zamāne guzar ga.e

himmat hai ab na quvvat-e-īmān-o-āgahī

vo kashtiyāñ jalā.e zamāne guzar ga.e

aatī hai ab chaman se ye ḳhushbū 'suhaib' kyoñ

jab ki bahār aa.e zamāne guzar ga.e

bijli kahin girae zamane guzar gae

jalwa use dikhae zamane guzar gae

tum se nigah haTti na thi wo bhi waqt tha

lamhat ab wo aae zamane guzar gae

kyon chhante ho KHak miyan ku-e-yar ki

us ko to KHat jalae zamane guzar gae

kaise kahen ki rabta us se raha nahin

jis ko hamein bhulae zamane guzar gae

ek bar us ki did ki hum ko hai aarzu

yaron fareb khae zamane guzar gae

ye kis guman mein ho hamein zer karke tum

hum ko to sar jhukae zamane guzar gae

himmat hai ab na quwwat-e-iman-o-agahi

wo kashtiyan jalae zamane guzar gae

aati hai ab chaman se ye KHushbu 'suhaib' kyon

jab ki bahaar aae zamane guzar gae