بجلی سی جدھر چمک رہی ہے

بجلی سی جدھر چمک رہی ہے

ہر آنکھ ادھر ہی تک رہی ہے

چل ان کی گلی میں زندگی چل

بے کار یہاں بھٹک رہی ہے

محسوس یہ ہو رہا ہے دھرتی

رفتہ رفتہ سرک رہی ہے

کیا حادثہ ہو گیا ہے کوئی

کیوں خلق خدا ٹھٹھک رہی ہے

اس شہر میں جس طرف بھی دیکھو

نفرت کی چتا دہک رہی ہے

بجتے ہیں کہیں پہ شادیانے

تنہائی کہیں سسک رہی ہے

میں تجھ کو کھٹک رہا ہوں یا پھر

میری شہرت کھٹک رہی ہے

چڑیا تو چلی گئی چہک کر

اب یاد تری چہک رہی ہے

آنکھوں میں خواب جاگتے ہیں

کھیتوں میں فصل پک رہی ہے

خاموش ہیں سب چراغ اے نورؔ

بیکار ہوا سنک رہی ہے