bijli si jidhar chamak rahi hai

bijlī sī jidhar chamak rahī hai

har aañkh udhar hī tak rahī hai

chal un kī galī meñ zindagī chal

bekār yahāñ bhaTak rahī hai

mahsūs ye ho rahā hai dhartī

rafta rafta sarak rahī hai

kyā hādisa ho gayā hai koī

kyoñ ḳhalq-e-ḳhudā ThiThak rahī hai

is shahr meñ jis taraf bhī dekho

nafrat kī chitā dahak rahī hai

bajte haiñ kahīñ pe shādiyāne

tanhā.ī kahīñ sisak rahī hai

maiñ tujh ko khaTak rahā huuñ yā phir

merī shohrat khaTak rahī hai

chiḌiyā to chalī ga.ī chahak kar

ab yaad tirī chahak rahī hai

āñkhoñ meñ ḳhvāb jāgte haiñ

khetoñ meñ fasl pak rahī hai

ḳhāmosh haiñ sab charāġh ai 'nūr'

be-kār havā sanak rahī hai

bijli si jidhar chamak rahi hai

har aankh udhar hi tak rahi hai

chal un ki gali mein zindagi chal

bekar yahan bhaTak rahi hai

mahsus ye ho raha hai dharti

rafta rafta sarak rahi hai

kya hadisa ho gaya hai koi

kyon KHalq-e-KHuda ThiThak rahi hai

is shahr mein jis taraf bhi dekho

nafrat ki chita dahak rahi hai

bajte hain kahin pe shadiyane

tanhai kahin sisak rahi hai

main tujh ko khaTak raha hun ya phir

meri shohrat khaTak rahi hai

chiDiya to chali gai chahak kar

ab yaad teri chahak rahi hai

aankhon mein KHwab jagte hain

kheton mein fasl pak rahi hai

KHamosh hain sab charagh ai 'nur'

be-kar hawa sanak rahi hai