bikhar gae dil-e-barbaad ka pata na chala

bikhar ga.e dil-e-barbād kā pata na chalā

athāh ranj kī mī.ād kā pata na chalā

amal shabīh se thā kis tarah judāgāna

abhī talak mire ham-zād kā pata na chalā

tamām shahr meñ īñdhan kī tarah jal kar bhī

hai chehra kaun sā dhanbād kā pata na chalā

maiñ apne aap se rūThā huuñ hai ḳhabar kis ko

ki umr bhar dil-e-nāshād kā pata na chalā

ugā hai dasht-e-sadā kis kī tuḳhm-kārī se

sukūt-e-be-asar us khaad kā patā na chalā

bayāñ kā ijz jhalaktā hai us kī āñkhoñ se

magar tavīl sī rūdād kā pata na chalā

bikhar gae dil-e-barbaad ka pata na chala

athah ranj ki miad ka pata na chala

amal shabih se tha kis tarah judagana

abhi talak mere ham-zad ka pata na chala

tamam shahr mein indhan ki tarah jal kar bhi

hai chehra kaun sa dhanbaad ka pata na chala

main apne aap se ruTha hun hai KHabar kis ko

ki umr bhar dil-e-nashad ka pata na chala

uga hai dasht-e-sada kis ki tuKHm-kari se

sukut-e-be-asar us khad ka pata na chala

bayan ka ijz jhalakta hai us ki aankhon se

magar tawil si rudad ka pata na chala