bikhar jata hai jab sapna to manzar mein nahin rahta

bikhar jaatā hai jab sapnā to manzar meñ nahīñ rahtā

havā kā aks ā.īnoñ ke jauhar meñ nahīñ rahtā

use ta.abīr karnā hai tulūa-e-ashk se lekin

vo ik bahtā ujālā hai samundar meñ nahīñ rahtā

jise maiñ DhūñDhtā rahtā huuñ tasvīroñ ke mele meñ

vo rangoñ kā talātum apne paikar meñ nahīñ rahtā

koī mauj-e-sarāb us meñ sarāyat hai ki ab aksar

fusūn-e-lams kā aalam gul-e-tar meñ nahīñ rahtā

bahut din ho ga.e us se nahīñ hai rābta merā

bahut din ho ga.e dil apne mehvar meñ nahīñ rahtā

bujhā kar pyaas jhīloñ se parinde uḌte jaate haiñ

koī bhī umr bhar āñkhoñ ke sāgar meñ nahīñ rahtā

'kafīl' āḳhir talab le jā.egī us ko vahāñ se bhī

musāfir der tak Thahrā khule dar meñ nahīñ rahtā

bikhar jata hai jab sapna to manzar mein nahin rahta

hawa ka aks aainon ke jauhar mein nahin rahta

use tabir karna hai tulua-e-ashk se lekin

wo ek bahta ujala hai samundar mein nahin rahta

jise main DhunDhta rahta hun taswiron ke mele mein

wo rangon ka talatum apne paikar mein nahin rahta

koi mauj-e-sarab us mein sarayat hai ki ab aksar

fusun-e-lams ka aalam gul-e-tar mein nahin rahta

bahut din ho gae us se nahin hai rabta mera

bahut din ho gae dil apne mehwar mein nahin rahta

bujha kar pyas jhilon se parinde uDte jate hain

koi bhi umr bhar aankhon ke sagar mein nahin rahta

'kafil' aaKHir talab le jaegi us ko wahan se bhi

musafir der tak Thahra khule dar mein nahin rahta