bikhar ke aise waqt ke main zalzale mein rah gaya

bikhar ke aise vaqt ke maiñ zalzale meñ rah gayā

ki lamha lamha ḳhud ko bas sameTne meñ rah gayā

Thahar ke jaane kyā safar meñ sochne meñ rah gayā

chalā to apne saath thā maiñ rāste meñ rah gayā

vo sach kī shakl meñ bharam kā de rahā thā ik gumāñ

ajiib sā ḳhayāl thā jo hāfize meñ rah gayā

jo jī meñ aaya zindagī vo bāteñ mujh se kah ga.ī

idhar maiñ soch soch kar hī bolne meñ rah gayā

ik ajnabī se roz milnā ho rahā hai in dinoñ

na jaane kis kā chehra mere aa.ine meñ rah gayā

mujhī meñ thī tū zindagī to kyoñ kahā nahīñ mujhe

kahāñ kahāñ maiñ tujh ko dekh DhūñDne meñ rah gayā

kabhī to is ko ek lamha jī ke dekhtā koī

zamānā zindagī faqat guzārne meñ rah gayā

usī kī justujū meñ to lagā hai aadmī magar

sukūñ use milā jo ḳhud se rābte meñ rah gayā

sadā.eñ ḳhud ko laakh diiñ magar kahīñ milā nahīñ

pata chalā ki maiñ to ḳhud ko bāñTne meñ rah gayā

bikhar ke aise waqt ke main zalzale mein rah gaya

ki lamha lamha KHud ko bas sameTne mein rah gaya

Thahar ke jaane kya safar mein sochne mein rah gaya

chala to apne sath tha main raste mein rah gaya

wo sach ki shakl mein bharam ka de raha tha ek guman

ajib sa KHayal tha jo hafize mein rah gaya

jo ji mein aaya zindagi wo baaten mujh se kah gai

idhar main soch soch kar hi bolne mein rah gaya

ek ajnabi se roz milna ho raha hai in dinon

na jaane kis ka chehra mere aaine mein rah gaya

mujhi mein thi tu zindagi to kyon kaha nahin mujhe

kahan kahan main tujh ko dekh DhunDne mein rah gaya

kabhi to is ko ek lamha ji ke dekhta koi

zamana zindagi faqat guzarne mein rah gaya

usi ki justuju mein to laga hai aadmi magar

sukun use mila jo KHud se rabte mein rah gaya

sadaen KHud ko lakh din magar kahin mila nahin

pata chala ki main to KHud ko banTne mein rah gaya