bikhar na ja kahin KHud ko meri panah mein rakh

bikhar na jā kahīñ ḳhud ko mirī panāh meñ rakh

haiñ tund-o-tez jo dariyā mirī nigāh meñ rakh

jhuke na sar ye kisī āstāñ pe tere sivā

to vo ġhurūr-o-anā apne kaj-kulāh meñ rakh

ye kab kahā ki mohabbat se baaz rah lekin

palaT ke aa bhī sake rāsta nigāh meñ rakh

fareb-e-nafs se mahfūz to ho zaat mirī

kahīñ to ḳhauf koī lazzat-e-gunāh meñ rakh

rahegā baaz kahāñ dil bhalā mohabbat se

par ek harf-e-tasallī to intibāh meñ rakh

muqābla to alag baat hai havāoñ se

jalā ke ek diyā koī pahle raah meñ rakh

asiir huuñ na kahīñ dām-e-hirs-o-duniyā kā

hamārā shauq-e-talab apnī bārgāh meñ rakh

chhupe haiñ karb hazāroñ is ik tabassum meñ

guloñ kī chaah jo kar ḳhaar bhī nigāh meñ rakh

abhī ḳhabar hī kahāñ tujh ko soz-e-dil kyā hai

to qahqahoñ ko abhī ruuh kī karāh meñ rakh

yahī ujāle kabhī chhīn leñge bīnā.ī

zarā sā shauq añdheroñ kā bhī nigāh meñ rakh

bikhar na ja kahin KHud ko meri panah mein rakh

hain tund-o-tez jo dariya meri nigah mein rakh

jhuke na sar ye kisi aastan pe tere siwa

to wo ghurur-o-ana apne kaj-kulah mein rakh

ye kab kaha ki mohabbat se baz rah lekin

palaT ke aa bhi sake rasta nigah mein rakh

fareb-e-nafs se mahfuz to ho zat meri

kahin to KHauf koi lazzat-e-gunah mein rakh

rahega baz kahan dil bhala mohabbat se

par ek harf-e-tasalli to intibah mein rakh

muqabla to alag baat hai hawaon se

jala ke ek diya koi pahle rah mein rakh

asir hun na kahin dam-e-hirs-o-duniya ka

hamara shauq-e-talab apni bargah mein rakh

chhupe hain karb hazaron is ek tabassum mein

gulon ki chah jo kar KHar bhi nigah mein rakh

abhi KHabar hi kahan tujh ko soz-e-dil kya hai

to qahqahon ko abhi ruh ki karah mein rakh

yahi ujale kabhi chhin lenge binai

zara sa shauq andheron ka bhi nigah mein rakh