bikharte TuTte lamhon ko apna ham-safar jaana

bikharte TūTte lamhoñ ko apnā ham-safar jaanā

ki thā is raah meñ āḳhir hameñ ḳhud bhī bikhar jaanā

sar-e-dosh-e-havā ik abr-pāre kī tarah ham haiñ

kisī jhoñke se pūchheñge ki hai ham ko kidhar jaanā

dil-e-āvāra kyā pābañd-e-zanjīr-e-ta.alluq ho

na thā bas meñ kisī ke bhī havā ko qaid kar jaanā

pas-e-zulmat koī sūraj hamārā muntazir hogā

isī ik vahm ko ham ne chirāġh-e-rah-guzar jaanā

hameñ to saath denā hai rafīqān-e-talātum kā

mubārak tujh ko tanhā is nadī ke paar utar jaanā

mire jalte hue ghar kī nishānī bas yahī hogī

jahāñ is shahr meñ kuchh raushnī dekho Thahar jaanā

suhāne mausamoñ kī yaad sikhlāyā tujhe kis ne

ufuq par diida o dil ke dhanak ban kar bikhar jaanā

hisār-e-zabt meñ rah kar ma.āl-e-hasrat-e-dil kyā

kisī qaidī parinde kī tarah ghuT ghuT ke mar jaanā

dayār-e-ḳhāmushī se koī rah rah kar bulātā hai

hameñ 'maḳhmūr' ik din hai usī āvāz par jaanā

bikharte TuTte lamhon ko apna ham-safar jaana

ki tha is rah mein aaKHir hamein KHud bhi bikhar jaana

sar-e-dosh-e-hawa ek abr-pare ki tarah hum hain

kisi jhonke se puchhenge ki hai hum ko kidhar jaana

dil-e-awara kya paband-e-zanjir-e-talluq ho

na tha bas mein kisi ke bhi hawa ko qaid kar jaana

pas-e-zulmat koi suraj hamara muntazir hoga

isi ek wahm ko hum ne chiragh-e-rah-guzar jaana

hamein to sath dena hai rafiqan-e-talatum ka

mubarak tujh ko tanha is nadi ke par utar jaana

mere jalte hue ghar ki nishani bas yahi hogi

jahan is shahr mein kuchh raushni dekho Thahar jaana

suhane mausamon ki yaad sikhlaya tujhe kis ne

ufuq par dida o dil ke dhanak ban kar bikhar jaana

hisar-e-zabt mein rah kar maal-e-hasrat-e-dil kya

kisi qaidi parinde ki tarah ghuT ghuT ke mar jaana

dayar-e-KHamushi se koi rah rah kar bulata hai

hamein 'maKHmur' ek din hai usi aawaz par jaana