bikne wale ko bharosa hai bahut bazar par

bikne vaale ko bharosa hai bahut bāzār par

phuul rakkhā rah gayā bolī lagī hai ḳhaar par

chaal sūraj chal rahā hai khel hai din-rāt kā

dhuup āñgan meñ utar ke chaḌh ga.ī dīvār par

jab davā denī thī chārāgar ne bas itnā kiyā

ik nayā ilzām us ne rakh diyā bīmār par

haar meñ rahte haiñ chhup ke jiit jaane ke sabaq

hausla zinda hai mātam kyoñ manā.eñ haar par

laḌ ke tūfāñ se vo kashtī paar lag jaatī magar

nā-ḳhudā ko thā yaqīñ ḳhud se ziyāda dhaar par

har ḳhushī be-rang lagtī dil kahīñ lagtā nahīñ

duur ham rahte haiñ ghar se jab kisī tyauhār par

bikne wale ko bharosa hai bahut bazar par

phul rakkha rah gaya boli lagi hai KHar par

chaal suraj chal raha hai khel hai din-raat ka

dhup aangan mein utar ke chaDh gai diwar par

jab dawa deni thi chaaragar ne bas itna kiya

ek naya ilzam us ne rakh diya bimar par

haar mein rahte hain chhup ke jit jaane ke sabaq

hausla zinda hai matam kyon manaen haar par

laD ke tufan se wo kashti par lag jati magar

na-KHuda ko tha yaqin KHud se ziyaada dhaar par

har KHushi be-rang lagti dil kahin lagta nahin

dur hum rahte hain ghar se jab kisi tyauhaar par