bin jaane bin parkhe kyon us but par jaan nisar karun

bin jaane bin parkhe kyoñ us but par jaan nisār karūñ

merā kyā hai maiñ to jis se mil luuñ us se pyaar karūñ

lafz to mere dil se ho kar apnā rañg dikhāte haiñ

jo sochūñ lafzoñ meñ Dhālūñ aur use shahkār karūñ

apnī ḳhvāhish zāhir kar ke kyoñ halkā mahsūs karūñ

milne ko jab jī chāhe to kyoñ us kā iz.hār karūñ

jo kaifiyyat duurī meñ hai us kī apnī lazzat hai

kyoñ mil kar us ko bhī kho duuñ ḳhud ko bhī be-kār karūñ

us ko buġhz hai mujh se lekin merā dil bhī saaf nahīñ

kyoñ na kaḌvā sach mānūñ maiñ kyoñ us se inkār karūñ

tum ne bhī bas vaqt guzārā maiñ ne bhī bas bāteñ kiiñ

tum is ko gar sach maano to maiñ bhī ye iqrār karūñ

bin jaane bin parkhe kyon us but par jaan nisar karun

mera kya hai main to jis se mil lun us se pyar karun

lafz to mere dil se ho kar apna rang dikhate hain

jo sochun lafzon mein Dhaalun aur use shahkar karun

apni KHwahish zahir kar ke kyon halka mahsus karun

milne ko jab ji chahe to kyon us ka izhaar karun

jo kaifiyyat duri mein hai us ki apni lazzat hai

kyon mil kar us ko bhi kho dun KHud ko bhi be-kar karun

us ko bughz hai mujh se lekin mera dil bhi saf nahin

kyon na kaDwa sach manun main kyon us se inkar karun

tum ne bhi bas waqt guzara main ne bhi bas baaten kin

tum is ko gar sach mano to main bhi ye iqrar karun