bin piye ek KHumar tha kya tha

bin piye ik ḳhumār thā kyā thā

terā chehra bahār thā kyā thā

vo rah-e-ishq meñ junūñ apnā

dil jo tujh par nisār thā kyā thā

vo mirā vahm yā haqīqat thī

terī nazroñ meñ pyaar thā kyā thā

bazm meñ terī mehrbāñ the bahut

merā un meñ shumār thā kyā thā

vaqt-e-ruḳhsat kisī kī āñkhoñ meñ

chhāyā kaisā ġhubār thā kyā thā

vo bhī royā thā dard-e-furqat meñ

lag rahā ashk-bār thā kyā thā

tere dil meñ sadā khaTaktā rahā

bad-gumānī kā ḳhaar thā kyā thā

kar ke phir mere e'tibār kā ḳhuun

jo gayā hai vo yaar thā kyā thā

ham the uljhan meñ aap bhī chup the

kaun sar par savār thā kyā thā

maiñ to mar kar bhī muntazir hī rahī

vo tirā intizār thā kyā thā

bin piye ek KHumar tha kya tha

tera chehra bahaar tha kya tha

wo rah-e-ishq mein junun apna

dil jo tujh par nisar tha kya tha

wo mera wahm ya haqiqat thi

teri nazron mein pyar tha kya tha

bazm mein teri mehrban the bahut

mera un mein shumar tha kya tha

waqt-e-ruKHsat kisi ki aankhon mein

chhaya kaisa ghubar tha kya tha

wo bhi roya tha dard-e-furqat mein

lag raha ashk-bar tha kya tha

tere dil mein sada khaTakta raha

bad-gumani ka KHar tha kya tha

kar ke phir mere e'tibar ka KHun

jo gaya hai wo yar tha kya tha

hum the uljhan mein aap bhi chup the

kaun sar par sawar tha kya tha

main to mar kar bhi muntazir hi rahi

wo tera intizar tha kya tha