bin tere mukammal koi manzar nahin hota

bin tere mukammal koī manzar nahīñ hotā

pahle kī tarah dil mirā muztar nahīñ hotā

zarra jo zamīñ kā ho vo aḳhtar nahīñ hotā

bhaTkā de jo manzil se vo rahbar nahīñ hotā

masrūf hai har shaḳhs so duniyā meñ magan hai

ab ḳhud ko mayassar bhī vo aksar nahīñ hotā

alfāz se ā.īna-e-dil chuur huā hai

lafzoñ se jo zālim koī patthar nahīñ hotā

aadam kī tabī'at ne khilā.e haiñ 'ajab gul

honā use insāñ bhī mayassar nahīñ hotā

haiñ zarf kī taqsīm ke qā.em-shuda darje

dariyā to kisī taur samundar nahīñ hotā

kuchh aadmī aise haiñ jinheñ laakh paḌhā lo

chāhat kā sabaq hī unheñ azbar nahīñ hotā

saudā na samātā jo tujhe 'ishq kā 'shamsa'

har shaḳhs ne thāmā huā patthar nahīñ hotā

bin tere mukammal koi manzar nahin hota

pahle ki tarah dil mera muztar nahin hota

zarra jo zamin ka ho wo aKHtar nahin hota

bhaTka de jo manzil se wo rahbar nahin hota

masruf hai har shaKHs so duniya mein magan hai

ab KHud ko mayassar bhi wo aksar nahin hota

alfaz se aaina-e-dil chur hua hai

lafzon se jo zalim koi patthar nahin hota

aadam ki tabi'at ne khilae hain 'ajab gul

hona use insan bhi mayassar nahin hota

hain zarf ki taqsim ke qaem-shuda darje

dariya to kisi taur samundar nahin hota

kuchh aadmi aise hain jinhen lakh paDha lo

chahat ka sabaq hi unhen azbar nahin hota

sauda na samata jo tujhe 'ishq ka 'shamsa'

har shaKHs ne thama hua patthar nahin hota