bin tere zindagi hogi na basar lagta hai

bin tire zindagī hogī na basar lagtā hai

tujh se ik pal bhī bichhaḌ jā.ūñ to Dar lagtā hai

tum jo rahte ho mire saath to ye ḳhasta makāñ

TuuTā phūTā huā jaisā bhī hai ghar lagtā hai

ye kabhī ashraf-e-maḳhlūq huā kartā thā

ab to ye aadmī kahne ko bashar lagtā hai

ye jo āñgan hai ye bāzār tak aa pahuñchā hai

ab mirā ghar bhī to ik rāhguzar lagtā hai

jis kī buniyād meñ iḳhlās-o-mohabbat ho ravāñ

phir usī peḌ pe ḳhushiyoñ kā samar lagtā hai

merī har baat pe tum ko jo yaqīñ hai 'sāhil'

is qadar sāda-mizājī se bhī Dar lagtā hai

bin tere zindagi hogi na basar lagta hai

tujh se ek pal bhi bichhaD jaun to Dar lagta hai

tum jo rahte ho mere sath to ye KHasta makan

TuTa phuTa hua jaisa bhi hai ghar lagta hai

ye kabhi ashraf-e-maKHluq hua karta tha

ab to ye aadmi kahne ko bashar lagta hai

ye jo aangan hai ye bazar tak aa pahuncha hai

ab mera ghar bhi to ek rahguzar lagta hai

jis ki buniyaad mein iKHlas-o-mohabbat ho rawan

phir usi peD pe KHushiyon ka samar lagta hai

meri har baat pe tum ko jo yaqin hai 'sahil'

is qadar sada-mizaji se bhi Dar lagta hai