bina-e-arz-o-falak harf-e-ibtida hun main

binā-e-arz-o-falak harf-e-ibtidā huuñ maiñ

bikhar gayā to samajh lo ki intihā huuñ maiñ

yūñhī sulagte raho aag kī qabā huuñ maiñ

tumheñ bachā.uñgā kyā ḳhud sulag rahā huuñ maiñ

uThā.e phirtā huuñ be-shaḳhsiyat badan apnā

aur apne gum-shuda chehre ko DhūñDhtā huuñ maiñ

ye kohar kohar se chehre dhuāñ dhuāñ āvāz

tumhāre shahr meñ shāyad abhī nayā huuñ maiñ

lahū lahū sī khañDar kī tamām īñTeñ haiñ

kahāñ se niklūñ ki ik āh-e-nā-rasā huuñ maiñ

na.ī hai mashq na jaane kahāñ pe gir jā.ūñ

nafas kī Dor pe kartab dikhā rahā huuñ maiñ

'kamāl' jhuuT hai yaaro faqat fareb hai vo

'kamāl' sach ko abhī tak talāshtā huuñ maiñ

bina-e-arz-o-falak harf-e-ibtida hun main

bikhar gaya to samajh lo ki intiha hun main

yunhi sulagte raho aag ki qaba hun main

tumhein bachaunga kya KHud sulag raha hun main

uThae phirta hun be-shaKHsiyat badan apna

aur apne gum-shuda chehre ko DhunDhta hun main

ye kohar kohar se chehre dhuan dhuan aawaz

tumhaare shahr mein shayad abhi naya hun main

lahu lahu si khanDar ki tamam inTen hain

kahan se niklun ki ek aah-e-na-rasa hun main

nai hai mashq na jaane kahan pe gir jaun

nafas ki Dor pe kartab dikha raha hun main

'kamal' jhuT hai yaro faqat fareb hai wo

'kamal' sach ko abhi tak talashta hun main