براجمان وہ گر دل کے آستان میں ہے

براجمان وہ گر دل کے آستان میں ہے

کوئی بتائے گا پھر کون لا مکان میں ہے

تمہاری یاد کا دھندلا سا نقش ہے دل پر

تمہارا عکس ابھی تک مرے گمان میں ہے

مجھے تو فخر ہے اردو میں شعر کہتا ہوں

مگر جو لطف مری مادری زبان میں ہے

جسے یہ اہل وفا دل کا نام دیتے ہیں

متاع جان ترا غم اسی دکان میں ہے

ہمیں تلاش نہ کرنا کتاب نفرت میں

ہمارا ذکر محبت کی داستان میں ہے

یہ شاعری مرے اسلاف کا اثاثہ ہے

سخنوری کا چلن میرے خاندان میں ہے

اسی نے ہم کو بھلایا ہے یار ساگرؔ جی

وہ ایک شخص جو اب تک مرے دھیان میں ہے