birajman wo gar dil ke aastan mein hai

birājmān vo gar dil ke āstān meñ hai

koī batā.egā phir kaun lā-makān meñ hai

tumhārī yaad kā dhuñdlā sā naqsh hai dil par

tumhārā aks abhī tak mire gumān meñ hai

mujhe to faḳhr hai urdu meñ sher kahtā huuñ

magar jo lutf mirī mādarī zabān meñ hai

jise ye ahl-e-vafā dil kā naam dete haiñ

matā.a-e-jān tirā ġham isī dukān meñ hai

hameñ talāsh na karnā kitāb-e-nafrat meñ

hamārā zikr mohabbat kī dāstān meñ hai

ye shā.erī mire aslāf kā asāsa hai

suḳhanvarī kā chalan mere ḳhāndān meñ hai

usī ne ham ko bhulāyā hai yaar 'sāgar' jī

vo ek shaḳhs jo ab tak mire dhiyān meñ hai

birajman wo gar dil ke aastan mein hai

koi bataega phir kaun la-makan mein hai

tumhaari yaad ka dhundla sa naqsh hai dil par

tumhaara aks abhi tak mere guman mein hai

mujhe to faKHr hai urdu mein sher kahta hun

magar jo lutf meri madari zaban mein hai

jise ye ahl-e-wafa dil ka nam dete hain

mataa-e-jaan tera gham isi dukan mein hai

hamein talash na karna kitab-e-nafrat mein

hamara zikr mohabbat ki dastan mein hai

ye shaeri mere aslaf ka asasa hai

suKHanwari ka chalan mere KHandan mein hai

usi ne hum ko bhulaya hai yar 'sagar' ji

wo ek shaKHs jo ab tak mere dhiyan mein hai