bisat-e-rang-o-bu aatish-fishan malum hoti hai

bisāt-e-rañg-o-bū ātish-fishāñ mālūm hotī hai

rag-e-gul meñ nihāñ barq-e-tapāñ mālūm hotī hai

tamannā hī se qaa.em hai vaqār-e-naujavānī bhī

tamannā garche jins-e-rā.egāñ mālūm hotī hai

kināra hai koī is kā na is kā koī sāhil hai

mohabbat ek bahr-e-be-karāñ mālūm hotī hai

guzishta vārdātoñ par maiñ jab bhī ġhaur kartā huuñ

mujhe har vārdāt ik dāstāñ mālūm hotī hai

vafā-koshī kā jazba sard paḌ jaatā hai piirī meñ

vafā parvarda-e-fikr-e-javāñ mālūm hotī hai

asar baaqī abhī tak hai nigāhoñ meñ javānī kā

mujhe har ek shai ab bhī javāñ mālūm hotī hai

jafā-o-jaur ke qisse haiñ ab bhī mo'atabar 'fāriġh'

vafā kī baat zeb-e-dāstāñ mālūm hotī hai

bisat-e-rang-o-bu aatish-fishan malum hoti hai

rag-e-gul mein nihan barq-e-tapan malum hoti hai

tamanna hi se qaem hai waqar-e-naujawani bhi

tamanna garche jins-e-raegan malum hoti hai

kinara hai koi is ka na is ka koi sahil hai

mohabbat ek bahr-e-be-karan malum hoti hai

guzishta wardaton par main jab bhi ghaur karta hun

mujhe har wardat ek dastan malum hoti hai

wafa-koshi ka jazba sard paD jata hai piri mein

wafa parwarda-e-fikr-e-jawan malum hoti hai

asar baqi abhi tak hai nigahon mein jawani ka

mujhe har ek shai ab bhi jawan malum hoti hai

jafa-o-jaur ke qisse hain ab bhi mo'atabar 'farigh'

wafa ki baat zeb-e-dastan malum hoti hai