biThai jaengi parde mein bibayan kab tak

bi.Thā.ī jā.eñgī parde meñ bībayāñ kab tak

bane rahoge tum is mulk meñ miyāñ kab tak

haram-sarā kī hifāzat ko teġh hī na rahī

to kaam deñgī ye chilman kī tīliyāñ kab tak

miyāñ se biibī haiñ parda hai un ko farz magar

miyāñ kā ilm hī uTThā to phir miyāñ kab tak

tabī.atoñ kā numū hai havā-e-maġhrib meñ

ye ġhairateñ ye harārat ye garmiyāñ kab tak

avaam bāñdh leñ dohar to third vānTar meñ

second-o-first kī hoñ band khiḌkiyāñ kab tak

jo muñh dikhā.ī kī rasmoñ pe hai musir iblīs

chhupeñgī hazrat-e-havvā kī beTiyāñ kab tak

janāb hazrat-e-'akbar' haiñ hāmī-e-parda

magar vo kab tak aur un kī rubā.iyāñ kab tak

biThai jaengi parde mein bibayan kab tak

bane rahoge tum is mulk mein miyan kab tak

haram-sara ki hifazat ko tegh hi na rahi

to kaam dengi ye chilman ki tiliyan kab tak

miyan se bibi hain parda hai un ko farz magar

miyan ka ilm hi uTTha to phir miyan kab tak

tabiaton ka numu hai hawa-e-maghrib mein

ye ghairaten ye hararat ye garmiyan kab tak

awam bandh len dohar to third wanTar mein

second-o-first ki hon band khiDkiyan kab tak

jo munh dikhai ki rasmon pe hai musir iblis

chhupengi hazrat-e-hawwa ki beTiyan kab tak

janab hazrat-e-'akbar' hain hami-e-parda

magar wo kab tak aur un ki rubaiyan kab tak