bolna chahiye jinko wo kahan bolte hain

bolnā chāhiye jin ko vo kahāñ bolte haiñ

ab to bas zulm ke har samt nishāñ bolte haiñ

lafz rusvā hoñ to phir ashk-e-ravāñ bolte haiñ

kūcha-e-yār meñ yuuñ dil-zadagāñ bolte haiñ

sirf dushman hī nahīñ rakhte 'adāvat mujh se

mere yāroñ ke bhī kuchh tīr-o-kamāñ bolte haiñ

vaise chup-chāp hī rahte haiñ tirī bazm meñ ham

bolte haiñ to mohabbat kī zabāñ bolte haiñ

aap ḳhāmosh haiñ kyoñ merī gavāhī ke liye

mere haq meñ to fulāñ-ibn-e-fulāñ bolte haiñ

aap ik lafz kaheñ mimbar-o-shāhī ke ḳhilāf

merī bābat to bahut sho’la-bayāñ bolte haiñ

sail-e-jamhūr se bachtā nahīñ taḳht-e-shāhī

jab kabhī teġh-ba-kaf pīr-o-javāñ bolte haiñ

āb-o-nāñ ke liye nāmūs gañvāte haiñ jab

muqtadir ke liye pīrān-e-muġhāñ bolte haiñ

apne maqsad se na ġhāfil ho ki is kā kyā ġham

yuuñ hī bāzār ke āvāra sagāñ bolte haiñ

barsar-e-ḳhāk bhī kuchh lutf ho ai abr-e-karam

dasht-o-sahrā meñ bahut tishna-labāñ bolte haiñ

ye alamnāk fazā bhī hai qayāmat 'rāhī'

sab haiñ chup-chāp makīñ aur makāñ bolte haiñ

bolna chahiye jin ko wo kahan bolte hain

ab to bas zulm ke har samt nishan bolte hain

lafz ruswa hon to phir ashk-e-rawan bolte hain

kucha-e-yar mein yun dil-zadagan bolte hain

sirf dushman hi nahin rakhte 'adawat mujh se

mere yaron ke bhi kuchh tir-o-kaman bolte hain

waise chup-chap hi rahte hain teri bazm mein hum

bolte hain to mohabbat ki zaban bolte hain

aap KHamosh hain kyon meri gawahi ke liye

mere haq mein to fulan-ibn-e-fulan bolte hain

aap ek lafz kahen mimbar-o-shahi ke KHilaf

meri babat to bahut sho’la-bayan bolte hain

sail-e-jamhur se bachta nahin taKHt-e-shahi

jab kabhi tegh-ba-kaf pir-o-jawan bolte hain

aab-o-nan ke liye namus ganwate hain jab

muqtadir ke liye piran-e-mughan bolte hain

apne maqsad se na ghafil ho ki is ka kya gham

yun hi bazar ke aawara sagan bolte hain

barsar-e-KHak bhi kuchh lutf ho ai abr-e-karam

dasht-o-sahra mein bahut tishna-laban bolte hain

ye alamnak faza bhi hai qayamat 'rahi'

sab hain chup-chap makin aur makan bolte hain