بوسیدہ مفلسی کی ردا تھی پھٹی رہی

بوسیدہ مفلسی کی ردا تھی پھٹی رہی

گرد و غبار وقت سے ہر دم اٹی رہی

موسم کی گرم سرد ہواؤں کا خوف کیا

اپنی حیات رنج و خوشی میں بٹی رہی

وہ شخص گر بھی جائے تو اس میں عجیب کیا

جس کی نگاہ راہ گزر سے ہٹی رہی

رشتوں کی ڈور ہوتی ہے نازک خیال رکھ

اک بار کٹ گئی تو ہمیشہ کٹی رہی

ہے کیسی سخت جان یہ چڑیا امید کی

جو سر پھری ہوا کے مقابل ڈٹی رہی

طوطے کا وصف ہے کہ سبق بھولتا نہیں

جو بات رٹ چکا وہ ہمیشہ رٹی رہی

جو کٹ گئی ندیمؔ گئی اپنے ہاتھ سے

ڈوری پتنگ کی جو کٹی تو کٹی رہی