بجھ گئے منظر افق پر ہر نشاں مدھم ہوا

بجھ گئے منظر افق پر ہر نشاں مدھم ہوا

لمحہ لمحہ سارا رنگ آسماں مدھم ہوا

تھک گئے ہمراہ میرے جاگنے والے سبھی

آخر شب مجھ میں بھی اک شور فغاں مدھم ہوا

محو ہو جاؤں گا میں بھی ایک دن ہر ذہن سے

آئنوں میں جیسے عکس رفتگاں مدھم ہوا

رات ڈھلتے ڈھلتے آئی صبح کی دہلیز تک

دل نے لے تبدیل کر دی ساز جاں مدھم ہوا

حاصل و درکار کی ہر فکر زائل ہو گئی

اک نظر اٹھی ہر اک رنگ زیاں مدھم ہوا

اب کہاں وہ صحرا زاد و پاسداران جنوں

صحرا صحرا وحشتوں کا ہر نشاں مدھم ہوا

حرف دلداری نہیں رسم دل آزاری نہیں

لہجۂ ہر مہرباں نا مہرباں مدھم ہوا

اک چراغ اک آئنہ میری متاع بے بہا

رہ گیا حرف یقیں نقش گماں مدھم ہوا

ہر نشان بام و در جب مٹ گیا اسلمؔ تو کیا

زور طوفاں تھم گیا آب رواں مدھم ہوا