bujh gae manzar ufuq par har nishan maddham hua

bujh ga.e manzar ufuq par har nishāñ maddham huā

lamha lamha saarā rañg-e-āsmāñ maddham huā

thak ga.e ham-rāh mere jāgne vaale sabhī

āḳhir-e-shab mujh meñ bhī ik shor-e-fuġhāñ maddham huā

mahv ho jā.ūñgā maiñ bhī ek din har zehn se

ā.inoñ meñ jaise aks-e-raftagāñ maddham huā

raat Dhalte Dhalte aa.ī sub.h kī dahlīz tak

dil ne lai tabdīl kar dī sāz-e-jāñ maddham huā

hāsil o darkār kī har fikr zaa.il ho ga.ī

ik nazar uTThī har ik rañg-e-ziyāñ maddham huā

ab kahāñ vo sahrā-zād o pās-dārān-e-junūñ

sahrā sahrā vahshatoñ kā har nishāñ maddham huā

harf-e-dil-dārī nahīñ rasm-e-dil-āzārī nahīñ

lahja-e-har-mehrbāñ nā-mehrbāñ maddham huā

ik charāġh ik aa.ina merī matā-e-be-bahā

rah gayā harf-e-yaqīñ naqsh-e-gumāñ maddham huā

har nishān-e-bām-dar jab miT gayā 'aslam' to kyā

zor-e-tūfāñ tham gayā āb-e-ravāñ maddham huā

bujh gae manzar ufuq par har nishan maddham hua

lamha lamha sara rang-e-asman maddham hua

thak gae ham-rah mere jagne wale sabhi

aaKHir-e-shab mujh mein bhi ek shor-e-fughan maddham hua

mahw ho jaunga main bhi ek din har zehn se

aainon mein jaise aks-e-raftagan maddham hua

raat Dhalte Dhalte aai subh ki dahliz tak

dil ne lai tabdil kar di saz-e-jaan maddham hua

hasil o darkar ki har fikr zail ho gai

ek nazar uTThi har ek rang-e-ziyan maddham hua

ab kahan wo sahra-zad o pas-daran-e-junun

sahra sahra wahshaton ka har nishan maddham hua

harf-e-dil-dari nahin rasm-e-dil-azari nahin

lahja-e-har-mehrban na-mehrban maddham hua

ek charagh ek aaina meri mata-e-be-baha

rah gaya harf-e-yaqin naqsh-e-guman maddham hua

har nishan-e-baam-dar jab miT gaya 'aslam' to kya

zor-e-tufan tham gaya aab-e-rawan maddham hua