bujh gae shoale dhuan aankhon ko pani de gaya

bujh ga.e sho.ale dhuāñ āñkhoñ ko paanī de gayā

ye achānak moḌ dariyā ko ravānī de gayā

ab to us kī dhuup meñ jaltā hai merā tan-badan

kyā huā vo mehr jo sub.heñ suhānī de gayā

jī meñ zinda ho ga.iiñ kyā ḳhvāhisheñ bisrī huī

phir koī yūsuf zuleḳhā ko javānī de gayā

phir huā ehsās yuuñ mujh ko ki maiñ ik naqsh huuñ

kaun tasvīroñ ko hukm-e-be-zabānī de gayā

peḌ nañge ho ga.e rastoñ pe patte haiñ abhī

haañ magar tūfān kuchh yādeñ nishānī de gayā

maiñ subuk-sar thā havāoñ kī tarah par ab nahīñ

yak-ba-yak ruknā tabī.at ko girānī de gayā

boltā chehra jhukī āñkheñ chhupā mat haath se

terā chup rahnā mujhe kyā kyā ma.ānī de gayā

jaise mere pair mauj-e-vāpsīñ par jam ga.e

har nayā lamha koī sūrat purānī de gayā

ai lab-e-goyā na chhin jaa.e kahīñ ye zā.iqa

chāTiye vo zaḳhm jo sho.ala-bayānī de gayā

maiñ ne 'shāhid' aa.ine meñ apnī sūrat dekh lī

ye zarā sā vāqi.a puurī kahānī de gayā

bujh gae shoale dhuan aankhon ko pani de gaya

ye achanak moD dariya ko rawani de gaya

ab to us ki dhup mein jalta hai mera tan-badan

kya hua wo mehr jo subhen suhani de gaya

ji mein zinda ho gain kya KHwahishen bisri hui

phir koi yusuf zuleKHa ko jawani de gaya

phir hua ehsas yun mujh ko ki main ek naqsh hun

kaun taswiron ko hukm-e-be-zabani de gaya

peD nange ho gae raston pe patte hain abhi

han magar tufan kuchh yaaden nishani de gaya

main subuk-sar tha hawaon ki tarah par ab nahin

yak-ba-yak rukna tabiat ko girani de gaya

bolta chehra jhuki aankhen chhupa mat hath se

tera chup rahna mujhe kya kya maani de gaya

jaise mere pair mauj-e-wapsin par jam gae

har naya lamha koi surat purani de gaya

ai lab-e-goya na chhin jae kahin ye zaiqa

chaTiye wo zaKHm jo shoala-bayani de gaya

main ne 'shahid' aaine mein apni surat dekh li

ye zara sa waqia puri kahani de gaya