bujh gai dil ki raushni rah dhuan dhuan hui

bujh ga.ī dil kī raushnī raah dhuāñ dhuāñ huī

subah chale kahāñ se the shaam hameñ kahāñ huī

shauq kī rāh-e-pur-ḳhatar tai to kar aa.e ham magar

nazr-e-havādis-e-safar daulat-e-jism-o-jāñ huī

ishq-o-junūñ ke vārdāt dīda-o-dil ke sānehāt

biitī huī har ek baat duur kī dāstāñ huī

koī bhī ab nahīñ rahā jis ko sharīk-e-ġham kaheñ

daur-e-tarab kī yaad bhī shāmil-e-raftagāñ huī

luT ga.ī kaise daf.atan raushniyoñ kī anjuman

aa ke kahāñ se ḳhema-zan zulmat-e-be-karāñ huī

kis ko ḳhabar ki ham ne kyā ḳhvāb bane haiñ umr-bhar

kis se kaheñ ki zindagī kis liye rā.egāñ huī

tarz-e-bayāñ to be-qayās the tire ġham-zadoñ ke paas

bol uThī nigāh-e-yās band agar zabāñ huī

bujh gai dil ki raushni rah dhuan dhuan hui

subah chale kahan se the sham hamein kahan hui

shauq ki rah-e-pur-KHatar tai to kar aae hum magar

nazr-e-hawadis-e-safar daulat-e-jism-o-jaan hui

ishq-o-junun ke wardat dida-o-dil ke sanehat

biti hui har ek baat dur ki dastan hui

koi bhi ab nahin raha jis ko sharik-e-gham kahen

daur-e-tarab ki yaad bhi shamil-e-raftagan hui

luT gai kaise dafatan raushniyon ki anjuman

aa ke kahan se KHema-zan zulmat-e-be-karan hui

kis ko KHabar ki hum ne kya KHwab bane hain umr-bhar

kis se kahen ki zindagi kis liye raegan hui

tarz-e-bayan to be-qayas the tere gham-zadon ke pas

bol uThi nigah-e-yas band agar zaban hui