bujh jae dil bashar ka to usko shifa se kya

bujh jaa.e dil bashar kā to us ko shifā se kyā

kis darja hogī kārgar us ko davā se kyā

jhulsā ke rakh diyā jise bād-e-sumūm ne

ġhunchoñ se kyā ġharaz use bād-e-sabā se kyā

do vaqt jis ġharīb ko roTī na ho nasīb

maz.hab kā kyā kare use zikr-e-ḳhudā se kyā

rahne ko jhoñpaḌā bhī na jis shaḳhs ko mile

us ko sazā kī fikr kyā us ko jazā se kyā

jis ke badan pe gosht dikhā.ī na de kahīñ

us aadmī ko ruuh kī nash-o-numā se kyā

tañg aa chukā ho kashmakash-e-zindagī se jo

kyā mah-vashoñ se kaam use dilrubā se kyā

fikr-e-ma.āsh hī se na fursat mile jise

sher-o-adab se kyā use mehr-o-vafā se kyā

suntā ho jo zamīr kī āvāz dosto

us ko kisī ḳhizar se kisī rahnumā se kyā

rahtā ho apnī zaat meñ jo mast har ghaḌī

us ko sarā-e-dahr kī āb-o-havā se kyā

kahnā ho jo bhī aap use barmalā kaheñ

lafzoñ ke her-pher se tarz-e-adā se kyā

bujh jae dil bashar ka to us ko shifa se kya

kis darja hogi kargar us ko dawa se kya

jhulsa ke rakh diya jise baad-e-sumum ne

ghunchon se kya gharaz use baad-e-saba se kya

do waqt jis gharib ko roTi na ho nasib

mazhab ka kya kare use zikr-e-KHuda se kya

rahne ko jhonpaDa bhi na jis shaKHs ko mile

us ko saza ki fikr kya us ko jaza se kya

jis ke badan pe gosht dikhai na de kahin

us aadmi ko ruh ki nash-o-numa se kya

tang aa chuka ho kashmakash-e-zindagi se jo

kya mah-washon se kaam use dilruba se kya

fikr-e-maash hi se na fursat mile jise

sher-o-adab se kya use mehr-o-wafa se kya

sunta ho jo zamir ki aawaz dosto

us ko kisi KHizar se kisi rahnuma se kya

rahta ho apni zat mein jo mast har ghaDi

us ko sara-e-dahr ki aab-o-hawa se kya

kahna ho jo bhi aap use barmala kahen

lafzon ke her-pher se tarz-e-ada se kya