bujha bujha ke jalata hai dil ka shoala kaun

bujhā bujhā ke jalātā hai dil kā sho.ala kaun

dikhā rahā hai mujhī ko mirā tamāsha kaun

sabhī ke chehroñ pe mehr-o-vafā kā ġhāza hai

kahūñ ye kaise parāyā hai kaun apnā

ḳhushī kī bazm meñ ham-raqs haiñ sabhī lekin

karegā paar mire saath ġham kā dariyā kaun

bahār aa.ī hai lekin khile haiñ aag ke phuul

har ik daraḳht meñ rakh kar gayā hai sho.ala kaun

ye phuul rañg sitāre fazā kī ra.anā.ī

uThā ke bhuul gayā apne ruḳh se parda kaun

yaqīn thā use aanā hai ek din lekin

achānak aa.ī to dil ne dhaḌak ke pūchhā kaun

varaq varaq pe mohabbat kī dāstāñ likh kar

'sarosh' soch rahā huuñ use paḌhegā kaun

bujha bujha ke jalata hai dil ka shoala kaun

dikha raha hai mujhi ko mera tamasha kaun

sabhi ke chehron pe mehr-o-wafa ka ghaza hai

kahun ye kaise paraya hai kaun apna

KHushi ki bazm mein ham-raqs hain sabhi lekin

karega par mere sath gham ka dariya kaun

bahaar aai hai lekin khile hain aag ke phul

har ek daraKHt mein rakh kar gaya hai shoala kaun

ye phul rang sitare faza ki ranai

uTha ke bhul gaya apne ruKH se parda kaun

yaqin tha use aana hai ek din lekin

achanak aai to dil ne dhaDak ke puchha kaun

waraq waraq pe mohabbat ki dastan likh kar

'sarosh' soch raha hun use paDhega kaun