بجھا بجھا سا ہے منظر کوئی چراغ نہیں

بجھا بجھا سا ہے منظر کوئی چراغ نہیں

خیال و خواب کا مظہر کوئی چراغ نہیں

کسی مزار پہ جلتا ہو یا سر محفل

مری نظر میں تو کمتر کوئی چراغ نہیں

بسا ہے دل میں جو ولیوں سا خوش نما چہرہ

اسی سے دل ہے منور کوئی چراغ نہیں

نشست زن ہے وہ رستے میں تیرگی کی سپاہ

مری کمک میں میسر کوئی چراغ نہیں

تمہاری آنکھ سے بڑھ کر کوئی بھی جام نہیں

تمہارے ساتھ سے بڑھ کر کوئی چراغ نہیں

ستارے اوڑھ کے سویا ہے وہ پری پیکر

مرے جہاں کے فلک پر کوئی چراغ نہیں

بتاؤں راز کی باتیں میں تم کو کیا آصفؔ

درود پاک سے بہتر کوئی چراغ نہیں