bujha chuki hai hawa jis ko wo diya bhi main

bujhā chukī hai havā jis ko vo diyā bhī maiñ

magar ye dekh bahut der tak jalā bhī maiñ

tavīl dhuup kī shiddat havāoñ kī yūrish

sahī bhī maiñ ne sar-e-dasht-e-ġham khilā bhī maiñ

mile qayām ke ahkām bhī mujhī ko yahāñ

masāfatoñ kā parastār ek thā bhī maiñ

mire nasīb meñ patjhaḌ ke rāstoñ kā safar

sadā-bahār dayāroñ se āshnā bhī maiñ

mujhī se aa.ī thī milne udaas chāñdnī raat

agar ye jāntā hotā to jāgtā bhī maiñ

mirī taraf thiiñ kabhī bārisheñ bhī phūloñ kī

hisār-e-sañg-o-sadā meñ ghirā huā bhī maiñ

ye sochtā huuñ kahūñ ḳhud ko 'qāsmī'! maiñ kyaa?

sukūt bhī mire andar bahut sadā bhī maiñ

bujha chuki hai hawa jis ko wo diya bhi main

magar ye dekh bahut der tak jala bhi main

tawil dhup ki shiddat hawaon ki yurish

sahi bhi main ne sar-e-dasht-e-gham khila bhi main

mile qayam ke ahkaam bhi mujhi ko yahan

masafaton ka parastar ek tha bhi main

mere nasib mein patjhaD ke raston ka safar

sada-bahaar dayaron se aashna bhi main

mujhi se aai thi milne udas chandni raat

agar ye jaanta hota to jagta bhi main

meri taraf thin kabhi barishen bhi phulon ki

hisar-e-sang-o-sada mein ghira hua bhi main

ye sochta hun kahun KHud ko 'qasmi'! main kya?

sukut bhi mere andar bahut sada bhi main