bujhai aag to raushan hua dhuan sa kuchh

bujhā.ī aag to raushan huā dhuāñ sā kuchh

hamāre haath meñ aayā hai rā.egāñ sā kuchh

qadam qadam pe dhaḌaktā hai dil umīdoñ kā

qadam qadam pe hai dar-pesh imtihāñ sā kuchh

kahīñ pe naqs mile aur koī baat bane

vo DhūñDte haiñ mire suud meñ ziyāñ sā kuchh

vahī to ban gayā baa.is girānī-e-jāñ kā

rakhā thā ghar meñ kahīñ par jo ḳhānumāñ sā kuchh

ab us ke ba.ad mukammal hai dāstān-e-hunar

idhar-udhar meñ biThāyā hai darmiyāñ sā kuchh

koī sarāb nahīñ hai ye merī ḳhush-nazarī

jo dasht meñ nazar aatā hai gulistāñ sā kuchh

hamāre naam vo mansūb ho gayā kyuuñ kar

zamīñ pe TuuT paḌā thā jo āsmāñ sā kuchh

ab us kī shahr meñ tash.hīr kyuuñ kareñ jā kar

huā hai gaañv meñ apne jo nā-gahāñ sā kuchh

bujhai aag to raushan hua dhuan sa kuchh

hamare hath mein aaya hai raegan sa kuchh

qadam qadam pe dhaDakta hai dil umidon ka

qadam qadam pe hai dar-pesh imtihan sa kuchh

kahin pe naqs mile aur koi baat bane

wo DhunDte hain mere sud mein ziyan sa kuchh

wahi to ban gaya bais girani-e-jaan ka

rakha tha ghar mein kahin par jo KHanuman sa kuchh

ab us ke baad mukammal hai dastan-e-hunar

idhar-udhar mein biThaya hai darmiyan sa kuchh

koi sarab nahin hai ye meri KHush-nazari

jo dasht mein nazar aata hai gulistan sa kuchh

hamare nam wo mansub ho gaya kyun kar

zamin pe TuT paDa tha jo aasman sa kuchh

ab us ki shahr mein tashhir kyun karen ja kar

hua hai ganw mein apne jo na-gahan sa kuchh