bujhe bujhe se charaghon se silsila paya

bujhe bujhe se charāġhoñ se silsila paayā

hujūm-e-yās meñ bhaTke to rāsta paayā

kisī ḳhayāl meñ ubhrā umiid kā chehra

kisī umiid meñ partav ḳhayāl kā paayā

na jaane kitne gharoñdoñ ko TūTte dekhā

kisī khañDar meñ tamannā kā naqsh-e-pā paayā

tamām raat nayā but tarāshte guzrī

huī jo sub.h to us but ko TūTtā paayā

qadam qadam pe mile yuuñ to qahqahe bikhre

darūn-e-jism koī shaḳhs chīḳhtā paayā

tilism TuuT gayā dhund chhaT ga.ī 'shāhid'

kahīñ pe Thahr ke socheñ ki ham ne kyā paayā

bujhe bujhe se charaghon se silsila paya

hujum-e-yas mein bhaTke to rasta paya

kisi KHayal mein ubhra umid ka chehra

kisi umid mein partaw KHayal ka paya

na jaane kitne gharondon ko TuTte dekha

kisi khanDar mein tamanna ka naqsh-e-pa paya

tamam raat naya but tarashte guzri

hui jo subh to us but ko TuTta paya

qadam qadam pe mile yun to qahqahe bikhre

darun-e-jism koi shaKHs chiKHta paya

tilism TuT gaya dhund chhaT gai 'shahid'

kahin pe Thahr ke sochen ki hum ne kya paya