bujhe bujhe se hain shair ke zehn-o-dil ke diye

bujhe bujhe se haiñ shā.ir ke zehn-o-dil ke diye

bhaTak rahā hai kahāñ jaa.e raushnī ke liye

ravish ravish pe daraḳhshāñ hai barq-e-ḳhauf-o-hirās

jhulas rahe haiñ dar-o-bām jazba-o-ehsās

nazar udaas hai vīrāñ haiñ saare nazzāre

jabīn-e-sub.h se phūTe lahū ke favvāre

zamīñ pe lāshoñ ke gulshan meñ ḳhuuñ kī namī

ab ehtimām-e-bahār-e-chaman meñ kyā hai kamī

jamāl-e-sub.h-e-vatan āñso.oñ meñ mudġham hai

urūs-e-fasl bahārāñ kī aañkh pur-nam hai

ba-faiz-e-jabr-o-sitam ġham ne fat.h paa.ī hai

vafā ke naam pe dil ne shikast khaa.ī hai

shi.ār-e-dīda-varī se guloñ ke shaad nahīñ

chaman ke phuul chaman haiñ ye un ko yaad nahīñ

sitam ko ahl-e-havas bhī sitam samajhte haiñ

ye aur baat hai sho.aloñ ko phuul kahte haiñ

simaTtī raat ke saa.e sahar kī raah meñ haiñ

ham aur chand ghaḌī zulm kī panāh meñ haiñ

bujhe bujhe se hain shair ke zehn-o-dil ke diye

bhaTak raha hai kahan jae raushni ke liye

rawish rawish pe daraKHshan hai barq-e-KHauf-o-hiras

jhulas rahe hain dar-o-baam jazba-o-ehsas

nazar udas hai viran hain sare nazzare

jabin-e-subh se phuTe lahu ke fawware

zamin pe lashon ke gulshan mein KHun ki nami

ab ehtimam-e-bahaar-e-chaman mein kya hai kami

jamal-e-subh-e-watan aansoon mein mudgham hai

urus-e-fasl bahaaran ki aankh pur-nam hai

ba-faiz-e-jabr-o-sitam gham ne fath pai hai

wafa ke nam pe dil ne shikast khai hai

shiar-e-dida-wari se gulon ke shad nahin

chaman ke phul chaman hain ye un ko yaad nahin

sitam ko ahl-e-hawas bhi sitam samajhte hain

ye aur baat hai shoalon ko phul kahte hain

simaTti raat ke sae sahar ki rah mein hain

hum aur chand ghaDi zulm ki panah mein hain