bujhe bujhe se sharare hain zard shaKHon par

bujhe bujhe se sharāre haiñ zard shāḳhoñ par

sajā gayā hai koī apnā dard shāḳhoñ par

safīr-e-shab kā koī ashk DhūñDte hoñge

havā ke jalte hue hoñT sard shāḳhoñ par

ayaañ hai rañg-e-taġhazzul guloñ ke chehroñ se

bayāz-e-rañg nahīñ fard fard shāḳhoñ par

lapeTe nuur kī chādar meñ dard ke saa.e

bhaTak rahā hai koī shab-navard shāḳhoñ par

havā kī god meñ mauj-e-sarāb bhī hogī

gireñge phuul to Thahregī gard shāḳhoñ par

piye hue haiñ shajar intihā-e-karb kā sam

ki hai numūd-e-gul-e-lā-javard shāḳhoñ par

urūs-e-bū-e-bahārāñ ne kyā sharārat kī

ki haiñ safīr-e-sabā ḳhud-nabard shāḳhoñ par

vo ik uḌaan meñ shohrat kā āsmāñ Thahrā

simaT ke rah ga.e bātoñ ke mard shāḳhoñ par

bujhe bujhe se sharare hain zard shaKHon par

saja gaya hai koi apna dard shaKHon par

safir-e-shab ka koi ashk DhunDte honge

hawa ke jalte hue honT sard shaKHon par

ayan hai rang-e-taghazzul gulon ke chehron se

bayaz-e-rang nahin fard fard shaKHon par

lapeTe nur ki chadar mein dard ke sae

bhaTak raha hai koi shab-naward shaKHon par

hawa ki god mein mauj-e-sarab bhi hogi

girenge phul to Thahregi gard shaKHon par

piye hue hain shajar intiha-e-karb ka sam

ki hai numud-e-gul-e-la-jaward shaKHon par

urus-e-bu-e-bahaaran ne kya shararat ki

ki hain safir-e-saba KHud-nabard shaKHon par

wo ek uDan mein shohrat ka aasman Thahra

simaT ke rah gae baaton ke mard shaKHon par