bujhi bujhi si nazar mein qarar kis ka hai

bujhī bujhī sī nazar meñ qarār kis kā hai

hameñ batā do tumheñ intizār kis kā hai

bahut aziiz haiñ tum ko magar zarā socho

vo jān-e-man hai to jān-e-bahār kis kā hai

sunā hai ham ne vo dushman hameñ samajhtā hai

agar ye sach hai to yaaro vo yaar kis kā hai

vo har kisī ko hī shak kī nazar se taktā hai

patā karo ki use e.atibār kis kā hai

abhī to us ne qadam hī rakhā hai mahfil meñ

nazar nazar meñ abhī se ḳhumār kis kā hai

lahūluhān saḌak se chalo zarā pūchheñ

kaTe saroñ meñ abhī tak shumār kis kā hai

jale gharoñ meñ bhī ham to sahī salāmat the

batāo ham pe abhī iḳhtiyār kis kā hai

hameñ patā hai zamāna tumhārā hai lekin

tumheñ patā hai vo parvardigār kis kā hai

bujhi bujhi si nazar mein qarar kis ka hai

hamein bata do tumhein intizar kis ka hai

bahut aziz hain tum ko magar zara socho

wo jaan-e-man hai to jaan-e-bahaar kis ka hai

suna hai hum ne wo dushman hamein samajhta hai

agar ye sach hai to yaro wo yar kis ka hai

wo har kisi ko hi shak ki nazar se takta hai

pata karo ki use eatibar kis ka hai

abhi to us ne qadam hi rakha hai mahfil mein

nazar nazar mein abhi se KHumar kis ka hai

lahuluhan saDak se chalo zara puchhen

kaTe saron mein abhi tak shumar kis ka hai

jale gharon mein bhi hum to sahi salamat the

batao hum pe abhi iKHtiyar kis ka hai

hamein pata hai zamana tumhaara hai lekin

tumhein pata hai wo parwardigar kis ka hai