bujhta chala hai shola dil-e-dagh-dar ka

bujhtā chalā hai sho'la dil-e-dāġh-dār kā

ab koī dam meñ kuuch hai sham'-e-mazār kā

hai ek tarah sho'la dil-e-dāġh-dār kā

bujhtā nahīñ charāġh hamārī mazār kā

dil kī shikastagī pas-e-murdan bhī hai 'ayāñ

shaq sau jagah se sang hai merī mazār kā

nām-āvaroñ ko aisā falak ne miTā diyā

miltā nahīñ nishāñ bhī ab un kī mazār kā

dūd-e-jigar ko jab na milī jā jahān meñ

parvāna ban gayā mirī sham'-e-mazār kā

khīñchūñ agar maiñ qabr meñ ik āh-e-ātishīñ

surma bisān-e-tūr ho patthar mazār kā

miTne se us ke nām-o-nishāñ ḳhalq se miTe

rakkhā hai naam lauh-e-tilism-e-mazār kā

sātoñ falak haiñ zulm ko kyā kam ki bā'd-e-marg

ik aur āsmān ho gumbad mazār kā

ham mar ga.e haiñ ishq meñ ik sabz rang ke

gumbad zamurradī ho hamārī mazār kā

madd-e-nazar ye hai ki miTā.eñ nishāñ talak

surma banā rahe haiñ vo sang-e-mazār kā

paḌhne lage vo fātiha merī samajh ke qabr

paayā kahīñ nishāñ jo kisī ke mazār kā

kah do ye dostoñ se banā.eñ na kuchh nishāñ

bas hai yahī nishān hamārī mazār kā

ro.egā ye bhī sham' kī sūrat tamām 'umr

hañsnā nahīñ hai ḳhuub charāġh-e-mazār kā

dam-bhar ko shāmiyāna lahad par vo ho gayā

uTThā bagūlā koī jo ḳhāk-e-mazār kā

kī justujū kahāñ na kahāñ dostoñ ne par

paayā kahīñ nishāñ na hamārī mazār kā

allah re apne tāle-e-ḳhvābīda kā asar

sabza bhī so rahā hai hamārī mazār kā

kaise ye jhoñke bād-e-muḳhālif ke chal ga.e

gul kar diyā charāġh hamārī mazār kā

kī soz-e-dil se mar ke jo ik āh-e-ātishīñ

misl-e-chinār jal gayā taḳhta mazār kā

vo bevafā bhī rone lagā aa ke qabr par

tā'vīz bā-asar hai hamārī mazār kā

uTh uTh ke baiTh baiTh gayā nā-tavāñ kī tarah

uTThā kabhī ġhubār jo ḳhāk-e-mazār kā

soz-e-darūñ se sang-e-lahad tak chaTak gayā

sabza harā ho ḳhaak hamārī mazār kā

allāh kyā hai tīra-o-tārīk merī qabr

zulmat hai naam kākul-e-sham-e-mazār kā

rote haiñ har lahad se lipaT kar vo zār-zār

miltā nahīñ nishāñ jo hamārī mazār kā

jal jā.eñge ġharīb patange idhar-udhar

raushan karo charāġh na merī mazār kā

ab pūchhte haiñ aap ki 'fāḳhir' guzar gayā

baaqī nishāñ talak na rahā jab mazār kā

bujhta chala hai sho'la dil-e-dagh-dar ka

ab koi dam mein kuch hai sham'-e-mazar ka

hai ek tarah sho'la dil-e-dagh-dar ka

bujhta nahin charagh hamari mazar ka

dil ki shikastagi pas-e-murdan bhi hai 'ayan

shaq sau jagah se sang hai meri mazar ka

nam-awaron ko aisa falak ne miTa diya

milta nahin nishan bhi ab un ki mazar ka

dud-e-jigar ko jab na mili ja jahan mein

parwana ban gaya meri sham'-e-mazar ka

khinchun agar main qabr mein ek aah-e-atishin

surma bisan-e-tur ho patthar mazar ka

miTne se us ke nam-o-nishan KHalq se miTe

rakkha hai nam lauh-e-tilism-e-mazar ka

saton falak hain zulm ko kya kam ki ba'd-e-marg

ek aur aasman ho gumbad mazar ka

hum mar gae hain ishq mein ek sabz rang ke

gumbad zamurradi ho hamari mazar ka

madd-e-nazar ye hai ki miTaen nishan talak

surma bana rahe hain wo sang-e-mazar ka

paDhne lage wo fatiha meri samajh ke qabr

paya kahin nishan jo kisi ke mazar ka

kah do ye doston se banaen na kuchh nishan

bas hai yahi nishan hamari mazar ka

roega ye bhi sham' ki surat tamam 'umr

hansna nahin hai KHub charagh-e-mazar ka

dam-bhar ko shamiyana lahad par wo ho gaya

uTTha bagula koi jo KHak-e-mazar ka

ki justuju kahan na kahan doston ne par

paya kahin nishan na hamari mazar ka

allah re apne tale-e-KHwabida ka asar

sabza bhi so raha hai hamari mazar ka

kaise ye jhonke baad-e-muKHalif ke chal gae

gul kar diya charagh hamari mazar ka

ki soz-e-dil se mar ke jo ek aah-e-atishin

misl-e-chinar jal gaya taKHta mazar ka

wo bewafa bhi rone laga aa ke qabr par

ta'wiz ba-asar hai hamari mazar ka

uTh uTh ke baiTh baiTh gaya na-tawan ki tarah

uTTha kabhi ghubar jo KHak-e-mazar ka

soz-e-darun se sang-e-lahad tak chaTak gaya

sabza hara ho KHak hamari mazar ka

allah kya hai tira-o-tarik meri qabr

zulmat hai nam kakul-e-sham-e-mazar ka

rote hain har lahad se lipaT kar wo zar-zar

milta nahin nishan jo hamari mazar ka

jal jaenge gharib patange idhar-udhar

raushan karo charagh na meri mazar ka

ab puchhte hain aap ki 'faKHir' guzar gaya

baqi nishan talak na raha jab mazar ka