bujhti aankhon ki raushni to dekh

bujhtī āñkhoñ kī raushnī to dekh

chashm meñ tairtī namī to dekh

aa kabhī tū qarīb aa mere

zīst-o-jāñ meñ tirī kamī to dekh

raat bhar jāgtī hai kyuuñ ye shab

jāgtī shab kī bekalī to dekh

umr bhar pāniyoñ ne likkhī pyaas

pāniyoñ kī ye tishnagī to dekh

saath rah kar bhī duur duur hai tū

zindagī kī ye dil-lagī to dekh

maiñ jo ab roz roz dekhtā huuñ

vo tamāshā tū do ghaḌī to dekh

hijr ke zalzale haiñ utre hue

ḳhud-kushī kartī vo nadī to dekh

bujhti aankhon ki raushni to dekh

chashm mein tairti nami to dekh

aa kabhi tu qarib aa mere

zist-o-jaan mein teri kami to dekh

raat bhar jagti hai kyun ye shab

jagti shab ki bekali to dekh

umr bhar paniyon ne likkhi pyas

paniyon ki ye tishnagi to dekh

sath rah kar bhi dur dur hai tu

zindagi ki ye dil-lagi to dekh

main jo ab roz roz dekhta hun

wo tamasha tu do ghaDi to dekh

hijr ke zalzale hain utre hue

KHud-kushi karti wo nadi to dekh