bul-hawas mein bhi na tha wo but bhi harjai na tha

bul-havas meñ bhī na thā vo but bhī harjā.ī na thā

phir bhī ham bahrūpiyoñ ko ḳhauf-e-rusvā.ī na thā

āñdhiyoñ ne sab miTā Daale nuqūsh-e-rah-guzār

ret ke siine pe dāġh-e-ābla-pā.ī na thā

raat ke kaale kuñ.eñ meñ chhup gayā saaya mirā

is se pahle to kabhī ye rañg-e-tanhā.ī na thā

vahm kā paikar thā āvezāñ dar-o-dīvār par

khiḌkiyoñ meñ chāñd mahv-e-jalva-ārā.ī na thā

sabz peḌoñ ke tane kaT kaT ke kyuuñ girne lage

ai havā maiñ qatl-o-ġhārat kā tamannā.ī na thā

raushnī detī thī chamkīle badan kī tāzgī

varna maiñ chehre ke ḳhāl-o-ḳhad kā shaidā.ī na thā

kyā tar-o-tāza thā āb-e-sub.h se naḳhl-e-shafaq

bujhte sūraj meñ to ye andāz-e-ra.anā.ī na thā

ek ik kirdār thā apnī adākārī meñ gum

us tamāshā-gāh meñ koī tamāshā.ī na thā

mar gayā 'siddīq' koh-e-ġham se Takkar maar kar

sar meñ saudā thā magar zauq-e-jabīñ-sā.ī na thā

bul-hawas mein bhi na tha wo but bhi harjai na tha

phir bhi hum bahrupiyon ko KHauf-e-ruswai na tha

aandhiyon ne sab miTa Dale nuqush-e-rah-guzar

ret ke sine pe dagh-e-abla-pai na tha

raat ke kale kunen mein chhup gaya saya mera

is se pahle to kabhi ye rang-e-tanhai na tha

wahm ka paikar tha aawezan dar-o-diwar par

khiDkiyon mein chand mahw-e-jalwa-arai na tha

sabz peDon ke tane kaT kaT ke kyun girne lage

ai hawa main qatl-o-ghaarat ka tamannai na tha

raushni deti thi chamkile badan ki tazgi

warna main chehre ke KHal-o-KHad ka shaidai na tha

kya tar-o-taza tha aab-e-subh se naKHl-e-shafaq

bujhte suraj mein to ye andaz-e-ranai na tha

ek ek kirdar tha apni adakari mein gum

us tamasha-gah mein koi tamashai na tha

mar gaya 'siddiq' koh-e-gham se Takkar mar kar

sar mein sauda tha magar zauq-e-jabin-sai na tha