bulao usko zaban-dan jo mazhari ka ho

bulāo us ko zabāñ-dāñ jo 'maz.harī' kā ho

magar hai shart ki ikkīsvīñ sadī kā ho

yaqīñ vahī hai jo āġhosh-e-tīrgī meñ mile

savād-v-vahm meñ ham-sāya raushnī kā ho

butoñ ko toḌ ke aisā ḳhudā banānā kyā

butoñ kī tarah jo ham-shakl aadmī kā ho

mirā ġhurūr na kyuuñ ho surūr se ḳhālī

jab us ke bhes meñ ik chor kam-tarī kā ho

bahut bajā hai ye maz.hab kī maut par mātam

magar koī to azā-dār shā.erī kā ho

hai vaqt vo ki musallam ho āzarī us kī

sanam-kadoñ meñ sanam zehn 'maz.harī' kā ho

bulao us ko zaban-dan jo 'mazhari' ka ho

magar hai shart ki ikkiswin sadi ka ho

yaqin wahi hai jo aaghosh-e-tirgi mein mile

sawad-w-wahm mein ham-saya raushni ka ho

buton ko toD ke aisa KHuda banana kya

buton ki tarah jo ham-shakl aadmi ka ho

mera ghurur na kyun ho surur se KHali

jab us ke bhes mein ek chor kam-tari ka ho

bahut baja hai ye mazhab ki maut par matam

magar koi to aza-dar shaeri ka ho

hai waqt wo ki musallam ho aazari us ki

sanam-kadon mein sanam zehn 'mazhari' ka ho