bulandi manzilon ki azm se baDh kar banata hun

bulandī manziloñ kī azm se baḌh kar banātā huuñ

nishān-e-rāh ḳhurshīd-o-mah-o-aḳhtar banātā huuñ

ye apnā zauq hai ki pattharoñ ke shahr meñ rah kar

tumhāre vāste shīshe kā hamdam ghar banātā huuñ

masā.ib se na ghabrānā mirī fitrat meñ shāmil hai

ġham-o-ranj-o-alam kā roz ik daftar banātā huuñ

mire shāhīñ-sifat bachche had-e-parvāz tak pahuñcheñ

kuchh is andāz se maiñ un ke bāl-o-par banātā huuñ

huuñ apnī qaum kā jarrāh yuuñ kahte haiñ ahl-e-fan

isī ḳhātir maiñ fikr-o-fan ke kuchh nashtar banātā huuñ

mirī ġhazloñ kā ek ik sher goyā ik sipāhī hai

maiñ kāġhaz ke sipāhī kaaT kar lashkar banātā huuñ

kahāñ mumkin vo apne 'shād' se bāteñ kareñ dil kī

ḳhayāloñ meñ visāl-e-yār ke manzar banātā huuñ

bulandi manzilon ki azm se baDh kar banata hun

nishan-e-rah KHurshid-o-mah-o-aKHtar banata hun

ye apna zauq hai ki pattharon ke shahr mein rah kar

tumhaare waste shishe ka hamdam ghar banata hun

masaib se na ghabrana meri fitrat mein shamil hai

gham-o-ranj-o-alam ka roz ek daftar banata hun

mere shahin-sifat bachche had-e-parwaz tak pahunchen

kuchh is andaz se main un ke baal-o-par banata hun

hun apni qaum ka jarrah yun kahte hain ahl-e-fan

isi KHatir main fikr-o-fan ke kuchh nashtar banata hun

meri ghazlon ka ek ek sher goya ek sipahi hai

main kaghaz ke sipahi kaT kar lashkar banata hun

kahan mumkin wo apne 'shad' se baaten karen dil ki

KHayalon mein visal-e-yar ke manzar banata hun