bulandiyon mein to parbat mahan hota hai

bulandiyoñ meñ to parbat mahān hotā hai

par us ke sar pe yahī āsmān hotā hai

tumhāre jhuuT meñ tahzīb kī miThās to thī

vagarna sach to bahut bad-zabān hotā hai

nayā thā rang magar shakl ek jaisī thī

musībatoñ kā bhī kyā ḳhāndān hotā hai

koī ḳhushī ise ḳhālī nahīñ karā saktī

ki dil to dard kā zaatī makān hotā hai

hamesha ḳhūn-e-jigar se adā kiyā maiñ ne

zamīn-e-'ishq pe kaisā lagān hotā hai

ugā rahā huuñ maiñ ḳhvāboñ kī fasl kāġhaz par

mirī tarah kā bhī koī kisān hotā hai

ḳhudī kī aag ko kaise bujhāoge 'fārūq'

ye sho'la ḳhuun meñ pal kar javān hotā hai

bulandiyon mein to parbat mahan hota hai

par us ke sar pe yahi aasman hota hai

tumhaare jhuT mein tahzib ki miThas to thi

wagarna sach to bahut bad-zaban hota hai

naya tha rang magar shakl ek jaisi thi

musibaton ka bhi kya KHandan hota hai

koi KHushi ise KHali nahin kara sakti

ki dil to dard ka zati makan hota hai

hamesha KHun-e-jigar se ada kiya main ne

zamin-e-'ishq pe kaisa lagan hota hai

uga raha hun main KHwabon ki fasl kaghaz par

meri tarah ka bhi koi kisan hota hai

KHudi ki aag ko kaise bujhaoge 'faruq'

ye sho'la KHun mein pal kar jawan hota hai