bulbul kahin hai phul kahin baghban kahin

bulbul kahīñ hai phuul kahīñ bāġhbāñ kahīñ

allāh phir dikhā.e na aisā samāñ kahīñ

gum-gashtgān-e-shauq kā aalam na pūchhiye

rahbar kahīñ hai raah kahīñ kārvāñ kahīñ

kar to rahe haiñ vo mirī barbādiyoñ kī fikr

ḳhud un kī ghaat meñ na hoñ barbādiyāñ kahīñ

hañste ho mere dāman-e-sad-chāk par hañso

parcham baneñ na fat.h kā ye dhajjiyāñ kahīñ

anjām-e-zabt-e-dard hai duniyā ke sāmne

bijlī kahīñ girī to chalīñ āñdhiyāñ kahīñ

ye bhī ḳhabar nahīñ ki gayā qāfila kidhar

ham to vahīñ ke ho rahe Thahre jahāñ kahīñ

chhuT jaa.e ai 'nazīr' na dāman yaqīn kā

gumrāh kar na deñ tujhe vahm-o-gumāñ kahīñ

bulbul kahin hai phul kahin baghban kahin

allah phir dikhae na aisa saman kahin

gum-gashtgan-e-shauq ka aalam na puchhiye

rahbar kahin hai rah kahin karwan kahin

kar to rahe hain wo meri barbaadiyon ki fikr

KHud un ki ghat mein na hon barbaadiyan kahin

hanste ho mere daman-e-sad-chaak par hanso

parcham banen na fath ka ye dhajjiyan kahin

anjam-e-zabt-e-dard hai duniya ke samne

bijli kahin giri to chalin aandhiyan kahin

ye bhi KHabar nahin ki gaya qafila kidhar

hum to wahin ke ho rahe Thahre jahan kahin

chhuT jae ai 'nazir' na daman yaqin ka

gumrah kar na den tujhe wahm-o-guman kahin