bulbul ke dil se uD gai fariyaad ki hawas

bulbul ke dil se uḌ ga.ī fariyād kī havas

nikle na niklī ḳhātir-e-sayyād kī havas

thoḌī sī umr aur ho yā-rab mujhe atā

rah jaa.e āsmāñ ko na bedād kī havas

bar aa.e kyā murād na chāhe agar ḳhudā

niklī iram banā ke na shaddād kī havas

har gul baġhair yaar hai gul-chīñ kā muntazir

har andalīb-e-bāġh ko sayyād kī havas

ai charḳh chāhiye kabhī aisā bhī inqalāb

shīrīñ ko ho nazāra-e-farhād kī havas

sar ko firāq-e-yār meñ hai ārzū-e-sang

gardan ko apnī ḳhanjar-e-jallād kī havas

kah do ki pā.emāl kare merī laash bhī

qātil ko rah ga.ī ho jo bedād kī havas

ḳhvāhāñ tire na ḳhuld meñ jaa.eñ na qaaf meñ

hai huur kī havā na parī-zād kī havas

shā.ir ko hirs-e-sher agar ho to kyā ajab

kis ko nahīñ hai kasrat-e-aulād kī havas

mānind-e-ā.ina hama-tan chashm hai ye dil

aisī hai dīd-e-husn-e-ḳhudā-dād kī havas

us gul kī aarzū hameñ laa.ī yahāñ talak

thī kis ko sair-e-gulshan-e-ījād kī havas

ham qaidiyoñ kā qaid meñ kis tarah jī bache

phere chhurī jo halq pe jallād kī havas

kiije madad 'asīr' kī hangām-e-naza.a hai

yā-murtazā hai aap se imdād kī havas

bulbul ke dil se uD gai fariyaad ki hawas

nikle na nikli KHatir-e-sayyaad ki hawas

thoDi si umr aur ho ya-rab mujhe ata

rah jae aasman ko na bedad ki hawas

bar aae kya murad na chahe agar KHuda

nikli iram bana ke na shaddad ki hawas

har gul baghair yar hai gul-chin ka muntazir

har andalib-e-bagh ko sayyaad ki hawas

ai charKH chahiye kabhi aisa bhi inqalab

shirin ko ho nazara-e-farhad ki hawas

sar ko firaq-e-yar mein hai aarzu-e-sang

gardan ko apni KHanjar-e-jallad ki hawas

kah do ki paemal kare meri lash bhi

qatil ko rah gai ho jo bedad ki hawas

KHwahan tere na KHuld mein jaen na qaf mein

hai hur ki hawa na pari-zad ki hawas

shair ko hirs-e-sher agar ho to kya ajab

kis ko nahin hai kasrat-e-aulad ki hawas

manind-e-aina hama-tan chashm hai ye dil

aisi hai did-e-husn-e-KHuda-dad ki hawas

us gul ki aarzu hamein lai yahan talak

thi kis ko sair-e-gulshan-e-ijad ki hawas

hum qaidiyon ka qaid mein kis tarah ji bache

phere chhuri jo halq pe jallad ki hawas

kije madad 'asir' ki hangam-e-naza hai

ya-murtaza hai aap se imdad ki hawas