buq’a-e-nur har ek rahguzar ho jae

buq’a-e-nūr har ik rāhguzar ho jaa.e

vo mirī raat se guzre to sahar ho jaa.e

husn-e-tābāñ kī tajallī kā vo 'ālam ho ki bas

ik jhalak dekh ke taskīn-e-nazar ho jaa.e

koī to jalva-kunāñ ho mah-o-anjum kī tarah

dīda-e-shauq kī jo rāhguzar ho jaa.e

‘āriz-e-husn pe rātoñ kā baserā hai to kyā

ruḳh se jhaTkā de jo zulfoñ ko sahar ho jaa.e

ham ki muusā nahīñ koī jo taqāzā karte

husn ḳhud chāhe to mahfūz-e-nazar ho jaa.e

ham vafā kar ke bhī badnām bahut haiñ yaaro

vo jafā bhī jo kareñ haiñ to hunar ho jaa.e

tum kuredā na karo dil kī dabī rākhoñ ko

sho'la sho'la na kahīñ ḳhāk-e-sharar ho jaa.e

sāmne us ke samundar kī haqīqat kyā hai

ek qatra jo gunahgār-e-guhar ho jaa.e

nau’-e-ādam meñ koī tuḳhm 'sahar' hai ki nahīñ

ḳhaak ke parde se nikle to bashar ho jaa.e

buq’a-e-nur har ek rahguzar ho jae

wo meri raat se guzre to sahar ho jae

husn-e-taban ki tajalli ka wo 'alam ho ki bas

ek jhalak dekh ke taskin-e-nazar ho jae

koi to jalwa-kunan ho mah-o-anjum ki tarah

dida-e-shauq ki jo rahguzar ho jae

‘ariz-e-husn pe raaton ka basera hai to kya

ruKH se jhaTka de jo zulfon ko sahar ho jae

hum ki musa nahin koi jo taqaza karte

husn KHud chahe to mahfuz-e-nazar ho jae

hum wafa kar ke bhi badnam bahut hain yaro

wo jafa bhi jo karen hain to hunar ho jae

tum kureda na karo dil ki dabi rakhon ko

sho'la sho'la na kahin KHak-e-sharar ho jae

samne us ke samundar ki haqiqat kya hai

ek qatra jo gunahgar-e-guhar ho jae

nau’-e-adam mein koi tuKHm 'sahar' hai ki nahin

KHak ke parde se nikle to bashar ho jae